தொடரும் எச்சரிக்கைக‌ள்!

தன்னைத் தானே சுழன்றுக்கொண்டே விநாடிக்கு 30 கி.மீ. (மணிக்கு 108,000 கி.மீ.) வேகத்தில் நகர்ந்துக் கொண்டிருக்கும் பூமி சின்னதாக ஒரு குலுங்கு குலுங்கினாலே ஆங்காங்கே பூமி பிளக்கிறது. கட்டிட்டங்கள் சரிந்து கற்குவியல்கள் ஆகின்றன‌. அதன் அதிர்ச்சியில் அலைக்கழிக்கப்படும் அலைகள் ஊருக்குள் எகிறிப் பாய்ந்து 'சுனாமி'யாக பெயர் சூட்டப்படுகிறது. பல ல‌ட்சம் மக்கள் மண்ணுக்குள்ளும், கடலுக்குள்ளுமாக கண்ணிமைக்கும் நேரத்தில் மாயமாய் மறைந்துப் போகிறார்கள். இவை அனைத்தும் இயற்கைதானா? இதன் பிண்ணனியில் இறைவனின் எச்சரிக்கை நமக்குத் தெரியவில்லையா?

படைப்புகளில் உயர்ந்த படைப்பாகவும் வடிவில் அழகிய அமைப்பாகவும் தன்னை உருவாக்கி,  இவ்வுலகில் வாழத் தேவையானவற்றைக் கொடுத்து, அவ்வப்போது வரும் துன்பங்களைக் கேட்டோ/கேட்காமலோ துடைத்து, அனுதினமும் எதிர்ப்பார்த்தும்/பார்க்காமலும் மகிழ்ச்சியினைக் கொடுத்து தன்னை மட்டும் வணங்கச் சொன்ன இறைவனையே இல்லையென்று சொல்லும் மனிதன் நன்றி கெட்டவன் இல்லையா?

படைத்தவனை சிந்தித்துணர முற்படாமல் படைப்பினங்கள் அவை உயிருள்ள பிராணிகளாயினும், உயிரற்ற பொருட்களாயினும், தன்னைப் போன்ற மனிதனே ஆயினும் அவற்றை வணங்கும் மனிதன் இறைவ‌னிடத்தில் துரோகி இல்லையா?

ஏக இறைவனை மட்டுமே வணங்கிக் கட்டுப்பட வழி தெரிந்தும் பெயரளவில் அதிலிருந்துக் கொண்டே தடம்புரண்டு செல்பவன் துரதிஷ்டவாதி இல்லையா?

மனிதனுக்கே இறைவனைப் பற்றிய அச்சமில்லாதபோது, தன் படைப்பினங்களில் நன்றிகெட்ட மனிதர்களை பூகம்பத்தினால் உயிருடன் பூமிக்குள் புதைக்க இறைவன் யாருக்கு அஞ்சவேண்டும்? மாட மாளிகையில் வாழ்பவர்களை சில நொடிப் பொழுதுக்குள் மண் குடிசைக்குள்ளோ, அதுவுமில்லாத நடுத்தெருவிலோ நிற்கவைக்க ஆலோசனைக் கூட்டமா தேவை அந்த இறைவனுக்கு?

இன்றைய நிகழ்ச்சி நாளைய வரலாறு! அத்தகைய‌ வரலாறுகள் ஏட்டில் எழுதி பூட்டி வைக்கவும், இணையத்தில் பகிர்ந்து இன்றே மறக்கவும் மட்டும் என்றால், அவை நமக்கு படிப்பினைத் தராவிட்டால் அந்த ஏக இறைவனுக்கா நஷ்டம்?

பூகம்பமும், சுனாமியும் உலகில் எங்கோ ஒரு இடத்தில்தானே நடக்கிறது என்று அலட்சியமாக கருதுவது அறியாமை! நாளை நம்மில் யாருடைய பூமி வேண்டுமானாலும் குலுங்கலாம் என்பதற்கான இறைவனின் முன்னெச்சரிக்கைகளே இவை! இன்று இந்தோனேஷியாவிலும் இதற்கு முன்னர் ஜப்பான், அமெரிக்கா போன்ற இடங்களிலும், ஏன்.. இந்தியாவிலும் (குறிப்பாக குஜராத்திலும்) இன்னும் பல இடங்களிலும் நடந்தவற்றையெல்லாம் சட்டை செய்யாமல், தான் நடத்தும் அநியாயங்களிலும் அக்கிரமங்களிலும் அளவுகடந்து போகக் கூடியவர்கள்/அதிலேயே நீடித்திருப்பவர்கள் இதைவிடவும் கொடிய தண்டனைகளை அட்வான்ஸாக இவ்வுலகிலேயே எதிர்ப்பார்த்துக் கொள்ளுங்கள் என்றுதானே இறைவன் அவ்வப்போது சிறிய அளவில்  எச்சரிக்கிறான்?

அருமை சகோதர, சகோதரிகளே! இம்மண்ணில் பிறந்துவிட்ட அனைவருக்கும் மரணம் ரிசர்வ் செய்யப்பட்ட ஒன்று என்பதை யாருமே மறுக்க முடியாது. ஆயினும் நம் யாருக்கும் அத்தகைய தண்டனையுடன் கூடிய மரணங்கள் ஏற்பட்டுவிடாமல் ஏக இறைவனிடம் மன்றாடுவோம்!

اَللّهُمَّ إِنّيْ أَعُوْذُ بِكَ مِنْ زَوَالِ نِعْمَتِكَ وَتَحَوُّلِ عَافِيَتِكَ وَفُجَائَةِ نِقْمَتِكَ وَجَمِيعِ سَخَطِكَ

அல்லாஹும்ம இன்னீ அஊது பி[B]க[K] மின் ஜ[Z]வாலி நிஃமதிக[K] வத[TH]ஹவ்வுலி ஆஃபியதி[TH]க வஃபுஜாஅதி[TH] நிக்ம[TH]திக[K] வஜமீஇ ஸஹதிக[K]

பொருள் :

இறைவா! உனது அருள் நீங்குவதை விட்டும், உனது நன்மை மாறிவிடுவதை விட்டும், உனது தண்டனை திடீரென வருவதை விட்டும், உனது அனைத்து கோபத்திலிருந்தும் உன்னிடம் பாதுகாப்புத் தேடுகிறேன்.