லெமன் க்ராஸ் கிரீன் டீ

லெமன் க்ராஸ் கிரீன் டீ என்பது ஒருவகை மூலிகை டீயாகும். நாம் பலவிதமாகவும் மூலிகை டீயை தயார் பண்ணலாம். ஒவ்வொன்றும் ஒவ்வொரு விதமாக‌ பயன் தரக்கூடியவை.

இதில் 'கிரீன் டீ' இலைகள் கலந்து செய்வதால் இந்த டீ இதயத்தை சுத்தப்படுத்தக் கூடியதாக உள்ளது. கொலஸ்ட்ராலைக் குறைக்கும். ப்ளட் பிரஷ்ஷர் உள்ளவ‌ர்கள் காலை, மாலை இரு வேளையும் தொடர்ந்து அருந்தி வந்தால் நல்ல பலன் கிடைக்கும். 'லெமன் க்ராஸ்' நல்ல செரிமாணத்தை உண்டு பண்ணும். கேன்சர் செல்களைக்கூட அழிக்கும் தன்மைக் கொண்டது என மருத்துவர்கள் கூறுகிறார்கள்! 'கிரீன் டீ'யிலும் 'ஆன்ட்டி கேன்சர்' தன்மைகள் இருப்பதால் இத்தகைய மூலிகை பானங்கள் இன்றைய காலகட்டத்தில் நம் ஒவ்வொருவருக்கும் மிக அவசியமானது என்று சொல்லலாம்.

இந்த 'லெமன் க்ராஸ்' கொஞ்சம் லெமனின் நறுமணமும் கொஞ்சம் இஞ்சியின் வாசனையும் கல‌ந்ததுபோல் இருக்கும். நல்ல மணமும் சுவையும் கொண்ட இந்த டீயை தினமும் அருந்தலாம்!

தேவையான பொருட்கள்:

லெமன் க்ராஸ் (1 இன்ச் அளவு) - 8 அல்லது 10 துண்டுகள்
கிரீன் டீ இலை - 1/2 ஸ்பூன்
சீனி - 5 ஸ்பூன்
தண்ணீர் - 2 டம்ளர்


செய்முறை:-

லெமன் க்ராஸ் துண்டுகளை நன்கு நசுக்கிக் கொள்ளவும்.

ஒரு பாத்திரத்தில் 2 டம்ளர் தண்ணீர் எடுத்துக் கொண்டு அதில் கிரீன் டீ இலைகள் மற்றும் லெமன் க்ராஸைப் போட்டு மெதுவாக அடுப்பை வைத்து சுமார் 10 நிமிடங்கள் நன்கு கொதிக்கவிடவும்.

ஒரு க்ளாஸில் சீனியைப் போட்டு கொதித்த டீயை வடிகட்டி, சிறிது ஆற்றி பரிமாறவும்.

குறிப்பு: கிரீன் டீயை அதிகம் சேர்த்தால் துவர்ப்புடன் கசப்பு சுவையும் கூடிவிடும். எனவே இங்கு கொடுக்கப்பட்டுள்ள அளவை கவனித்துக் கொள்ளவும்.