விளையும் பயிர்களே! உங்களுக்காக... (பாடம் 1)

குழந்தைகளுக்கான இஸ்லாமிய பொது அறிவு

நம் அன்பான குழந்தைச் செல்வங்களுக்கு உலகக் கல்வியைக் கற்றுத் தருவதோடு, சரியான முறையில் வாழத் தேவையான அடிப்படை மார்க்க அறிவையும் வளரும் பருவத்திலேயே நாம் சொல்லிக் கொடுப்பது அவசியமாகும். நாளைய சமுதாயத்தின் ஆணிவேர், இன்றைய குழந்தைகளே! எனவே குழந்தைகள் தெரிந்திருக்கவேண்டிய, (குர்ஆனிலிருந்தும் நபி(ஸல்)அவர்களின் ஆதாரப்பூர்வமான ஹதீஸ்களிலிருந்தும் எடுக்கப்பட்ட) அடிப்படை விஷயங்களைத் தொகுத்து, பகுதி பகுதிகளாக பிரித்துக் கொடுக்கும் சிறிய முயற்சி இது. ஒவ்வொரு நாளும் இவற்றை நம் குழந்தைகளுக்கு சொல்லிக் கொடுப்பதற்கு ஏதுவாக, ஒவ்வொரு பகுதியும் சிறு சிறு பகுதிகளாக கேள்வி-பதில் வடிவத்தில் கொடுக்கப்படும் இன்ஷா அல்லாஹ்!

1 . நம்மைப் படைத்த இறைவன் யார்?

நம்மைப் படைத்த இறைவன் அல்லாஹ்.

2. இறைவன் நம்மை மட்டும்தான் படைத்தானா?

இல்லை. நம்மையும், வானங்கள், சூரியன், சந்திரன், நட்சத்திரங்கள், பூமி மற்றும் அதிலுள்ள கடல்கள், மலைகள், மரங்கள், மற்ற கண்ணுக்குத் தெரிந்த/தெரியாத கோடானு கோடி உயிரினங்கள், உயிரற்ற இயற்கைப் பொருட்கள் அத்தனையும் அவனே படைத்தான். 

3 . நம் இறைவன் எங்கே இருக்கிறான்?

நம் இறைவன்(அல்லாஹ்) ஏழு வானங்களுக்கும் மேலே உள்ள அர்ஷில் இருக்கிறான்.

4. எதனால் நாம் அல்லாஹ்வுக்கு என்றும் அஞ்சி வாழ‌வேண்டும்?

அல்லாஹ் எப்போதும்/எந்த நொடியிலும்/இரவிலும், பகலிலும்/எந்த இடத்தில் இருந்தாலும் நம்மைக் கண்காணித்துக் கொண்டிருப்பவன். அதனால் அவனுக்கு என்றும் அஞ்சி வாழ‌வேண்டும்.

5. அல்லாஹ்வின் அர்ஷை சுமப்பதற்கு அல்லாஹ்வால் நியமிக்கப்பட்டவர்கள் யார்?

வானவர்கள்(மலக்குகள்) என்ற இறைவனின் படைப்புகள்.

6. அல்லாஹ்வின் தன்மைகளில் சிலவற்றைக் கூறு.

அல்லாஹ் தன் படைப்பினங்களுக்கு அளவில்லாத அருள் புரிபவன். நிகரில்லாத அன்பு காட்டுப‌வன். மிக்க கருணையாளன். அவனுக்கு இணையாக எவரையாவது, எதையாவது வணங்கினால் அதை மன்னிக்காமல் தண்டிப்பதில் கடுமையானவன்.(அல்லாஹ் நம்மை பாதுகாப்பானாக!) மற்ற பாவங்களை தான் விரும்பினால் மன்னிப்பவன்.

7. அல்லாஹ்வை நாம் எவ்வாறு அறிந்துக் கொள்கிறோம்?

திருக்குர்ஆன் கூறும் இறைவனின் அற்புதமான அத்தாட்சிகள் மூலமும் அவனுடைய இறுதித்தூதர் முஹம்மத் நபி(ஸல்) அவர்கள் விளக்கிச் சென்ற வாழ்க்கைப் பாடங்களின் மூலமும் நாம் அல்லாஹ்வை அறிகிறோம்.

8. அனைத்து முஸ்லிம்களும் கட்டாயம் தெரிந்துக் கொள்ளவேண்டிய மூன்று அடிப்படை விஷயங்கள் யாவை?

1) இவ்வுலகைப் படைத்து, பாதுகாத்து, நிர்வகித்து வருபவனும் மறு உலகின் அதிபதியுமான‌ நம் இறைவனான அல்லாஹ்வைப் பற்றி அறிந்து கொள்ளுதல்.

2) அவனுடைய தூதர் முஹம்மது நபி (ஸல்)அவர்களைப் பற்றி அறிந்து கொள்ளுதல்.

3) இஸ்லாமிய‌ மார்க்கத்தைப் பற்றி சரியான முறையில் அறிந்து கொள்ளுதல்.

9. அல்லாஹ்வைப் பற்றி நாம் அவசியம் தெரிந்துக்கொள்ள‌ வேண்டியவை எவை?

அல்லாஹ் ஒருவனே; அவன் எந்த தேவையுமற்றவன்; பரிசுத்தமானவன்; அவனுக்கு இணைதுணை இல்லை. அவன் யாரையும் பெறவும் இல்லை; யாராலும் பெறப்படவுமில்லை. அதனால் அவனுக்கு முன்னோர்களோ, வாரிசுகளோ, குடும்பமோ இல்லை. அவனுக்கு நிகராக இவ்வுலகில் எதுவுமே இல்லை.  உணவு, உறக்கம், மறதி, மயக்கம், இயலாமை அவனுக்கு கிடையாது. அவனுக்கு நோய் நொடிகளோ மரணமோ இல்லை. 

10. அல்லாஹ்விற்கு பிரியமான‌ நேசர்கள் யார்?

அல்லாஹ்வின் நேசர்கள் அல்லாஹ்விற்கு அதிகம் அஞ்சி, நேரான சத்திய வழியில் நடப்பவர்கள். எல்லா வகையான பாவங்களில் இருந்தும் தங்களைப் பாதுகாத்துக் கொள்பவர்கள். அனைத்து விதமான நல்ல வணக்கங்களையும் செய்து வருபவர்கள். திருக்குர்ஆனையும், நபி(ஸல்)அவர்களின் வழி முறைகளையும் மட்டுமே வாழ்க்கையில் கடைப்பிடித்து வருபவர்கள். நன்மைகளை ஏவி, தீமைகளை விட்டும் தடுப்பவர்கள். இவை அனைத்தும் பெற்றவர்கள்.