ஹகீம் பொரியல் (காட்டுக்கறி)

தற்போது எல்லா இஸ்லாமிய இல்லங்களிலும் குர்பானி கறி பகிரப்பட்டு பலவிதமான சமையல்களும் செய்த வண்ணமிருக்கும் இந்த நேரத்தில், பீஃபில் செய்யும் இந்த ரெசிபி உதவியாக இருக்கலாம். இது மிகவும் வித்தியாசமாகவும், சுவையாகவும் இருக்கும். எந்தவித மசாலா பொடிகளும் கிடையாது. மசாலா வாசனை இல்லாமல் சமைக்க விரும்பும் நேரங்களில்கூட இதுபோன்று செய்யலாம். ரொம்ப சிம்பிளும்கூட!

பெயர்க் காரணம்: ஹகீம் = டாக்டர் (வைத்தியர்). மசாலா இன்றி செய்வதற்கு ஏதோ ஒரு காலத்தில் வைத்தியர்கள் சொல்லித்தந்த முறை என்பதால் இதற்கு 'ஹகீம் பொரியல்' என்ற இந்த பெயர் வந்ததாக சொல்வார்கள். அதுபோல் இந்த முறையில் செய்வது 4, 5 நாட்களுக்கு வீணாகாமல் இருக்கும் என்பதற்காக‌, காடுகளில் வேட்டையாட செல்பவர்கள் இதுபோன்று எடுத்துச் செல்வார்கள் என்பதால் 'காட்டுக்கறி' என்றும் சொல்வார்கள்.

தேவையான பொருட்கள்:

(எலும்பில்லாத‌) பீஃப் - 400 கிராம்
காய்ந்த மிளகாய் - சுமார் 8
எண்ணெய் - 3 டேபிள்ஸ்பூன்
வினிகர் - 2 டேபிள்ஸ்பூன்
உப்பு - சுமார் 1/2 டேபிள்ஸ்பூன்

செய்முறை:

பீஃப் துண்டுகளை சுத்தம் செய்து, சிறு துண்டுகளாக வெட்டி, உப்பு, வினிகர் சேர்த்து, காய்ந்த மிளகாயையும் நறுக்கி அதில் போட்டு பிரட்டி 1/2 மணி நேரம் ஊற‌வைக்க‌வும்.

ஊறிய கறியில் 2 டேபிள்ஸ்பூன் எண்ணெய் சேர்த்து பிரஷ்ஷர் குக்கரில் போட்டு, (மீடியம் ஹீட்டில்) 3 விசில் வரை வேகவிடவும்.

வெந்தவுடன் நன்கு சுருளவிட்டு இறக்கவும். மிகவும் சுலபமாக செய்யக்கூடிய ஹகீம் பொரியல் (காட்டுக்கறி) ரெடி! மிளகாயுடன் சேர்த்து சாப்பிட அருமையாக இருக்கும். தயிர் சாதம், சாம்பார் சாதம், லெமன் ரைஸ் போன்ற அனைத்துக்கும் நல்ல காம்பினேஷன்!