மரவள்ளிக் கிழங்கு அடை

தேவையான பொருட்கள்:

மரவள்ளிக் கிழங்கு - 600 கிராம்
கன்டன்ஸ்டு (சுகர்) மில்க் - 3 டேபிள்ஸ்பூன்
கன்டன்ஸ்டு (நான் சுகர்) - மில்க் 50 மில்லி
பசுநெய் - 3 டீஸ்பூன்
சீனி - (சுமார்) 150 மில்லி
முந்திரிப் பருப்பு - 2 பிடி
தேங்காய்த் துருவல் - 2 கப்
உப்பு - 2 டீஸ்பூன்

 

செய்முறை:

மரவள்ளிக் கிழங்கை தோல் நீக்கி சன்னமாக‌ துருவிக் கொள்ளவும்.

அத்துடன் தேங்காய்த் துருவல், (உடைத்த) முந்திரிப் பருப்பு, பசுநெய், சீனி, உப்பு மற்றும் மில்க் வகைகளைச் சேர்க்கவும்.

நன்கு புரட்டிய பிறகு நெய் தடவிய தட்டில் கொட்டி(1) பரத்தவும்(2).

ஸ்டீமரில் வைத்து நன்கு வேக வைக்கவும்.

சுமார் 20 நிமிடங்கள் கழித்து (ஃபோர்க் அல்லது கத்தி கொண்டு) வெந்துவிட்டதை உறுதிசெய்துக் கொள்ளவும்.

சற்று ஆறியவுடன் துண்டுகள் போடவும். விரும்பிய நட்ஸ் கொண்டு அலங்கரித்து பரிமாற‌லாம்.‌‌

பிற்ச்சேர்க்கை:-

இந்த சமையல் குறிப்பு ஜலீலா அக்கா நடத்தும் 'பேச்சுலர் சமையல் போட்டி'க்கு அனுப்பி வைக்கப்பட்டுள்ளது.

மரவள்ளிக் கிழங்கு பற்றிய‌ சில குறிப்புகள்:

* மரவள்ளிக் கிழங்கைச் சமைக்கும்போது முழுமையாக வேகவைத்த பிறகே சாப்பிட‌வேண்டும்.

* மரவள்ளிக் கிழங்கில் கேன்சரைத் தடுத்து, அழிக்கும் வேதிப் பொருள் உள்ளதாக அனுபவப் பூர்வமாக கண்டறியப்பட்டுள்ளது.

* சர்க்கரை நோயாளிகள் மரவள்ளிக் கிழங்கினைத் தவிர்ப்பது நல்லது என்றும் சொல்கிறார்கள்.

* மரவள்ளிக் கிழங்கைச் சமைக்கும்போது இஞ்சியைக் கலந்து சமைத்தல் அல்லது அதனுடன் இஞ்சி கலந்த உணவுப் பொருட்களை உட்கொள்வது சில‌ மோசமான‌ பாதிப்புகளை உண்டாக்கலாம் என சொல்ல‌ப்படுகிறது. எனினும் இது சரியான தகவல்தானா எனத் தெரியவில்லை. (இத சாப்பிடும்போது தேவையில்லாம ஏன் இஞ்சிய வேற சேர்த்துக்கிட்டு?)

* கோடைக்காலத்தில் இந்தக் கிழங்கு வகைகள் அதிக உஷ்ணத்தைக் கொடுக்கும் என்பதால் அப்போது குறைவாக சாப்பிட்டுக் கொண்டு, குளிர்காலத்தில் சாதாரணமாக சாப்பிடலாம் என்பதும் ஒரு தகவல்.

(கூடுதல் தகவல் தெரிந்தவர்கள் பின்னூட்டத்தில் பகிர்ந்துக் கொள்ளலாம்.)