உறையும் பனியிலும் கனியும் "காக்கி"!

"காக்கி" என்ற "ஷரன் ஃப்ரூட்"

நுங்கின் வழவழப்பும் சப்போட்டாவின் சுவையும் கலந்ததுபோல் இருக்கும், சத்துக்கள் நிறைந்த "காக்கி"(Kaki) பழத்தைப் பற்றிய சில தகவல்களையும் அதன் சத்துக்களையும் பற்றி பார்ப்போம்.

ஜப்பான், சீனா போன்ற நாடுகளை தாய்நாடாகக் கொண்ட இந்தப் பழத்தில் சுமார் 800 வகைகள் இருப்பதாக சொல்லப்படுகிறது. ஆங்கிலத்தில் "sharon fruit" என்றும் "Persimmon" என்றும் அழைக்கப்படுகிறது.

சிகப்பு கலந்த ஆரஞ்சு நிறத்தில் இருக்கும் "காக்கி"யில், நாட்டுத் தக்காளி வடிவம், சிம்லா ஆப்பிள் போன்ற வடிவம், உருளை வடிவம் என‌ பல வடிவங்கள் உள்ளன. இவை -5°C முதல் -20°C வரை குளிரைத் தாங்கக்கூடியது. (கீழுள்ள படங்களைப் பார்க்கவும்.) இவ்வளவு கடுமையான குளிரிலும் கூட‌ காக்கி பழம் பதமான நிலையில் பழுக்குமாம்!

இலையுதிர் காலங்களிலும், அதைத் தொடர்ந்து வரும் பனிக் காலங்களிலும் இலைகள் பழுத்து விழுந்த பிறகும் கூட, பழங்கள் மட்டும் கிளைகளில் பிடித்து நிற்பது கண்ணைக் கவரும் விதத்தில் காட்சியளிக்கும்.

இதிலுள்ள 'Costata', 'Fuyu' மற்றும் 'Muscat' போன்ற வகைகள் மகரந்த சேர்க்கை எதுவுமில்லாமலேயே காய் - கனியாவது, இறைவன் இவ்வுலகில் கொட்டி வைத்திருக்கும் அற்புதங்களில் ஒன்றாகும்! இவை சற்று தாமதமாக பூத்தாலும், விளைச்சல் அதிகமாகக் கொடுக்கக் கூடியவை. பச்சை நிற மொட்டிலிருந்து வெளிர் மஞ்சள் நிறத்தில் பூக்கும் அதன் பூவையும், காயாகி, கனியாகும் அழகையும் பாருங்கள்!

                                                    

                                                                            

                                                                

                                                                                              

                                                                                        

                                                                   

                                                                                                          

இதன் வகைகளில் 'sharon fruit' தான் உலகெங்கிலும் அதிகமாக விளையக் கூடியதாக இருக்கிறது. இதில் சில வகைப் பழங்கள் நார்த்தன்மை உடையதும், தோலில் துவர்ப்புத் தன்மையும் கொண்டிருக்கும். அழுத்தினால் லேசாக அழுந்தும் நிலையில் , ஆனால் சற்று அழுத்தமான பதத்தில் பழுத்த பழம்தான் அப்படியே தோலுடன் வெட்டி சாப்பிடுவதற்கு ஏற்றதாகும். மிகவும் பழுத்து (தண்ணீர்ப்பை போன்ற நிலையில்) இருந்தால் தோலுடன் சாப்பிட முடியாது. (தோல் துவர்ப்பாகிவிடும்)

இவை பாதி காயவைத்த நிலையிலும், நன்றாக காய்ந்த பழங்களாக (dry fruit)வும் கூட விற்பனைக்கு வருகின்றன.

                                                                            

                                                                                                            

சத்துக்கள்:‍

'காக்கி'யில் பலவகையான மினரல்களும், வைட்டமின் C யும் நிறைந்துள்ளன. மேலும் இதில் நார்ச்சத்து, புரோட்டீன், கால்ஷியம், மக்னீஷியம், சோடியம் மற்றும் B1 & B2 போன்ற வைட்டமின்களும், ஃபோலிக் ஆசிட் (வைட்டமின் B9) போன்றவையும், சிறிய அளவில் இரும்புச் சத்தும் அடங்கியுள்ளன.
(படங்கள் இணையத்திலிருந்து)

கூடுதல் தகவல்கள்:

எல்லா வகை மண்ணிலும் வளரக்கூடிய இதன் மரம், 6 மீட்டர் முதல் 10 மீட்டர் வரை வளரக்கூடியது. அதிலும் சில வகை 15 மீட்டர் வரை வளரும். ஆனால் தோட்டத்தில் சிறிய அளவு இடமே இதற்கு போதுமானது. தோட்டத்தில் சிறிய ஒரு இடத்தில் பாத்தி கட்டியும் வளர்க்கலாம். தோட்டமே இல்லையென்றாலும் பால்கனி, மொட்டை மாடிகளில் கூட குறைந்த தண்ணீர் பாய்ச்சி, தகுந்த தொட்டிகளில் வளர்க்கலாம். தோட்டங்களில் வளர்ப்பவர்கள் முதல் வருடம் மட்டுமே கொஞ்சமாக தண்ணீர் ஊற்றி வந்தால் போதுமானது. வருடம் முழுவதும் எல்லாக் காலங்களிலும் இதை பயிரிடலாம் என்றாலும், வசந்த காலமே பயிரிட ஏற்றதாகும். உறையும் நிலையிலுள்ள கடுமையான குளிர் காலங்களில் பயிரிடுவது நல்ல‌தல்ல. ஆனால் மரம் தழைத்து வளர்ந்த பிறகு, அதிகமான விளைச்சல் தரக்கூடிய தகுந்த காலங்கள், இலையுதிர் மற்றும் பனிக்காலங்களாகும். அதாவது இந்த காலங்களில்தான் காக்கி பழத்தின் சீசனாகும். வீடுகளில் வளர்ப்பதற்கு எல்லோருக்கும் வசதிகள் இருக்காது என்றாலும், வளர்க்க வசதியுள்ளவர்களுக்கு இந்த தகவல்கள் நிச்சயம் உதவும்.

இந்த காக்கி பழத்தில் செய்யக்கூடிய சுவையான, சுலபமான மில்க் ஷேக் தயாரிப்பு முறையை இங்கே காணவும்.